Управниот одбор на Ракометниот клуб Охрид се сретна со градоначалникот Никола Бакрачески и бизнис заедницата од градот. Со обезбедување на опстанокот во Супер лигата охриѓани ја остварија првичната цел пред почетокот на сезоната.
– На организациски план Ракометниот клуб Охрид стана силна ракометна институција со можност за надоградување во иднина. Целта која ја имавме зацртано пред стартот на сезоната ја остваривме. Сакаме да им се заблогадариме на бизнис заедницата и градоначалникот Никола Бакрачески за укажаната доверба и за целокупната поддршка – претседателот на УО, Димитар Спасески.
Првиот човек на Охрид, Бакрачески најави дека ќе продолжи да го помага развојот на охридскиот ракометен тим.
– Многу сум задоволен што се направивме со РК Охрид во првата сезона од Супер лигата. Им се заблагодарувам на бизнис заедницата која покажа висока свест за општествената одговорност и помогна заеднички да подигнеме ракометниот клуб на повисоко ниво. Сето тоа придонесе Охрид да стане и ракометен центар што секако се потврди со организација на завршницата од Купот на Македонија во ракомет. Исто така среќен сум што и женскиот ракометен клуб „Моби Дик“ следната сезона ќе игра во елитата. Општината Охрид и јас како прв човек на градот недвосмислено ќе стоиме зад РК Охрид трудејќи се од година во година да се издвојуваат што повеќе средства за развој на спортот – потенцираше Бакрачески.
Од работењето и успесите на клубот задоволство искажа и бизнис заедницата која искажа подготвеност и во иднина да биде дел од структурата на клубот.
Мх.П.
