По долгогодишна иницијатива, конечно градот на културата, доби професионален театар. Веста лично дојде да ја соопшти министерката за култура Елизабета Канческа Милевска. Одлука за формирање на професионален театар во Охрид деновиве е донесена на седница на Владата.


–Охридскиот театар ќе функционира во состав на националната установа центар за култура „Григор Прличев“, а во него ќе бидат вработени пет актери и уметнички директор, за што наскоро ќе биде распишан конкурс, истакна министерката Канческа Милевска.

Видно возбуден, актерот и режисер Горан Стојаноски, рeче дека ова е историска одлука со која се реализира долгогодишниот сон на тимот ентузијасти што го туркаше проектот за формирање на театарот.

–Не можам да ја скријам возбудата, дека по толку години од 1954 година и после  силни напори, можам со големо срце да кажам дека Охрид конечно има свој професионален театар.Тоа е за мене историски настан, рече Стојаноски.

Првата премиера на новиот театар Стојаноски ја најави за април, а од понудените проекти ќе зависат финансиските средства со кои министертвото ќе го поддржи театарот. Покрај ова, предвидено е во Охрид со свои претстави да гостуваат и другите театри од земјата.