Актерите од охридскиот Народен театар утре, премиерно ќе ја изведат комедијата „ Детектор на лаги“ во режија на Ненад Витанов, според текст на Василиј Сигарев.
Како што истакна режисерот Витанов, примарна цел при подготвувањето на претставата била публиката да се забавува.
– Сакавме публиката да ја види нашата идеја, да се прикажат машко женските односи кои отсекогаш се непроменети, само се менуваат околностите и формата во која ќе се завиткаат. Ова е приказна за двајца сопружници кои имаат проблематичен однос и кои дошле до критична точка кога мораат да побараат помош од стручно лице- психијатар. Во реалниот живот кога доаѓа до една таква ситуација почнува трагедијата, но во театарот почнува комедијата, изјави Витанов.
Во претставата улогите ги толкуваат актерите: Јасмина Билаловиќ, Никола Тодороски и Стрезо Стаматовски.
– Оваа претстава е една комична фарса дури и научно фантастична. Секогаш се поставува прашањето дали е возможно кај некого да се всади идеја и тој да ја прифати како негова?Дали е возможно да се всади туѓа емоција која ќе ја прифати како негова? Колку е возможно со магично стапче да се решаваат проблемите? Токму тие прашања ги обработува оваа претстава, вели актерот Стаматовски.
– Ја играм Нада во своите средни години која припаѓа на понизок социјален слој која има своја интелегенција, снаодлива е и која секогаш смета дека е во право и дека се знае најдобро. Го повикува докторот не со цел да ги советува, туку за банална работа. И тука започнува комичниот заплет, објаснува актерката Билаловиќ.
– Драго ми е што учествувам во една ваква претстава- комедија, жанр што мене ми е омилен. Претставата нуди час и половина квалитетно поминато време, вели Тодороски.
Претпремиерно претставата ќе биде изведена денес со почеток во 20 часот, кога влезот е бесплатен. Репризата на претставата е на 30- ти октомври.
Т.К.
