Агенцијата за храна и ветеринарство, издаде решение за задолжително земање на мостри за лабораториско испитување на афлатоксини во целокупните количини млеко и преработки од млеко кои се увезуваат во земјава.
До добивање на резултатите од анализите на мострите, млекото и преработките од млеко кои се увезуваат ќе бидат складирани кај увозниците, односно, нема да се пуштат во промет се додека за нив не се добијат позитивни резултати дека се безбедни. Доколку анализите потврдат присуство на афлатоксини над дозволеното, увезените количини млеко и преработки од млеко со наредба на Агенцијата ќе бидат уништени.
– Засилени се и контролите на фамите, во преработувачките капацитети, како и на домашниот пазар, информираат од агенцијата.
Оттаму додаваат дека производството на млеко во државава е под постојан мониторинг на Агенцијата за храна и ветеринарство, преку спроведување на Националниот мониторинг план за контрола на резидуи од ветеринарно медицински препарати и контаминенти кај живите животни и производите од животинско потекло во Република Македонија, кој е одобрен од Европската Комисија.
