– Се напивме шампањско под вода и сакаме да им посакаме здравје и успех и среќа на сите граѓани на Република Македонија, истакна Милутин Секулоски, еден од иницијаторите на подводното украсување на елка во водите на Охридското Езеро.
Во украсувањето на елката која е поставена во Заливот на коските во Градиште на длабочина од 5 метри учествуваа петнаесеттина нуркачи. Меѓу нив имаше и нуркачи кои прв пат учествуваа во овој несекојдневен настан.
– На овој начин заеднички ја споделуваме радоста и посакувам Новата година да ни мине со леснотија, изјави Милан Лазарески, кому ова му беше прво китење на подводната елка.
Спонзор на оваа своевидна атракција годинава е весникот „Нова Македонија“, кој обезбеди пакетчиња за најмладите, кои најдрагиот подарок го добија лично од Дедо Мраз.
Охридските нуркачи ги преброија и годините откако се украсува подводната елка, по што заклучија дека е потребна корекција, односно според најновата пресметка, денешното е десетто јубилејно китење на празничното дрво во водите на Охридското Езеро.