Шеснаесет пливачи од шест држави, шест во женска и десет во машка конкуренција денес ja пливаат патеката „Климе Савин“ во должина од 25 километри од Свети Наум до Охрид во рами на 38-от Охридски пливачки маратон.
Боите на Македонија ги бранат пет маратонци и тоа: Росана Гошева, Александар Илиевски, Леонид Мишевски, Петар Цеков и Лазар Поп Трајков.
На маратонот учествуваат и пливачите Елена Лионело, Федерико Тамборино, Марко Инглима и Матео Фурлан од Италија, Алисја Гедриш од Полска, Милица Љубисављевиќ од Србија, Ерика Абигал Јенсен, Мајте Ајлен Пука, Акуилес Балаудо и Матиас Дијас Хернандес од Аргентина, како и Хуго Риберио од Португалија.
Стартот го означи градоначалникот на Општина Охрид, Кирил Пецаков од Св. Наум во 10 часот. Се очекува првите пливачи на целта, на Градското пристаниште да пристигнат околу 16 часот.
На првата контролна точка кај Љубаништа пливаат во група која ја предводи нашиот Александар Илиевски со време на минување 43:27 минути.
Организатор на маратонот е плувачкиот клуб „Охридски бранови 2008“, а се одржува под покровителство на претседателката на државата Гордана Сиљановска – Давкова, Министерството за спорт, Пливачката асоцијација на Македонија и Општина Охрид.
Наградниот фонд, како што информира организаторот, изнесува 15.000 евра.
Охридскиот пливачки маратон и оваа година е дел од Фестивалот на спортови на вода (Ohrid Water Festival).
Н.С.Ј.
фото. А. Момироска
Видео. Г.М.
