Кај мостот пред хотелот „Палас“ денеска околу пладне се појави нафтeна дамка од околу дваесетина метри квадратни.
Нафтената дамка од која се ширела непријатна миризба први ја забележале граѓаните од околните куќи на кејот, кои го пријавиле случајот во Капетанијата. Оттаму го известиле надлежниот општински инспектор по екологија, Лилјана Спиркоска, која веднаш излегла на терен. Според неа состојбата не е алармантна. „Дамката не е последица од хаварија на некој пловен објект, туку најверојатно е предизвикана од измивање на бродовите на градското пристаниште од дождот кој денеска наврна во Охрид“, ни изјави во телефоснки разговор, Спиркоска.
Спротивно на ваквото мислење, во Капетанијата сметаат дека нафтената дамка е предизвикана од невнимателно танкирање гориво од бродовите на пристаништето. Оттаму велат дека не е прв пат да се случуваат вакви еколошки инциденти, поради што треба да се размислува за побезбеден начин на танкирање гориво во пловните објекти. Тие реагираат дека каналот Студенчишта каде се влева водата од Билјанини извори е претворен во ремонтен центар, а неретко разниот отпад наместо во депонија завршува во езерските води. Загрижени за состојбата се и граѓаните кои очекуваат државата да преземе итни мерки за заштита на Охридското Езеро пред да се случи поголема еколошка катастрофа.
нафтена дамка на кејот
Г.М.
