Хидробиолошкиот институт од Охрид денеска изврши порибување на Охридското Eзеро со 380.000 млади пастрмки. Годинава ова е четврто порибување на езерото каде вкупно до сега се пуштени 1.800.000 пастрмки.
До крајот на годинава ќе биде извршено уште едно порибување со охридски пастрмки со што вкупниот број подмладок ќе надмине 2.000.000 единки што е блиску до потребниот оптимум, истакна министерот за земјоделство, шумарство и водостопанство, Ацо Спасеноски. Тој додаде дека со вакво темпо од три до пет години популацијата на охридска пастрмка ќе го достигне потребниот оптимум за нејзин природен прираст. Тоа, според него ќе овозможи комерцијално стопанисување на пастрмката и нејзино враќање на менијата во рестораните.
Ацо Спасеноски
Директотот на хидробиолошкиот институт, Гоце Костоски, истакна дека за да достигне пастрмката тежина од еден килограм потребни се седум години, а за да биде полово зрела и требаат три години. Затоа, рече тој, потребно е да се подготви посебна програма, не замо за риболов туку и за репродукција на охридската пастрмка.
Гоце Костоски
Министерот Спасеноски денеска упати апел до локалната самоуправа, здруженијата на граѓани и локалното население активно да се вклучат во заштитата на овој автохтон и ендемичен вид риба. Спасеноски најави редица мерки во таа насока како натамошно порибување и обновување на рибниот фонд, засилени рибочуварски служби и контроли и зајакната контрола на рестораните за да се утврди потеклото на риба која се продава како охридска пастрмка.
Ohridnews.com
