Комитетот за туризам при Владата на седницата што се одржа вчера ја разгледал информацијата за отпочнување на постапка за градење на нови сместувачки капацитети со „планинска конотација“, односно мали хотели и апартмани на повеќе локации во земјава, меѓу кои и на планината Галичица. Вакви капацитети предвидено е уште да се изградат и на Пониква, Берово, Крушево, Голак, Пехчево, Вевчани, Лазарополе, Смоларски водопади, Галичник, Тресонче, Радовиш и Гари.
Комитетот за туризам расправал и за Стратегијата за медицински туризам, за развојот на новите форми на туризам во националните паркови, како и за проектот за изградба на планинарски и велосипедски патеки. На седницата била разгледана иницијативата за формирање на Национална асоцијација на македонски винарии, како и можноста за посета на ловните капацитети од страна на туроператори од Италија кои би помогнале во развој и промоција на ловниот туризам.
Исто така се разговарало и за реализацијата на проектот за изградба на атрактивен ски центар Попова Шапка.
