Пешевски укажа дека либерализацијата на регионалниот енергетски пазар, како обврска што Македонија ја има преземено со стапувањето во енергетската заедница, во определни сегменти ќе донесе придобивки како што е привлекувањето повеќе странски инвестиции во областа. Тој посочи и на одредени негативни аспекти, оттаму што поголемиот пазар за електрична енергија значи и дерегулација на цената, односно може да се очекува во наредените години и притисок за зголемување на цената на електричната енергија.
– Познато е дека во Македонија во овој момент цената на електричната енергија е меѓу најниските во регионот. Ние како Влада ќе настојуваме колку е максимално можно да ја одржиме цената под контрола. Неопходно ќе биде да се изнајде баланс помеѓу процесот и брзината на либерализацијата и што ќе биде она што извршната власт ќе го прави за заштита на населението од прекумерен пораст на цената на електричната енергија, нагласи Пешевски.
Во рамки на годинешното советување истакнати експерти од Европа ќе ги презентираат своите искуства и размислувања на тема „Либерализацијата на регионалниот пазар на електрична енергија во Југоисточна Европа“, а ќе бидат одржани и технички презентиации на афирмирани компании во областа на електроенергетиката. Ќе бидат претставени и резултатите од проектот „Предизвици на преносните системи оператори од ЈИЕ“, финансиран од Европската комисија преку програмата „ФП1“.
