Владата следната недела ќе распише меѓународен тендер за привлекување на авикомпанија со ниски цени на летовите, за што ќе бидат доделени и субвенции, најави премиерот Никола Груевски.
Како што пренесува „Макфакс“, обврска на авиокомпанијата ќе биде да отвори шест нови линии.
„Во тендерот ќе се предвидат 40.000 евра да бидат дадени веднаш, за првите шест линии, а потоа за секоја наредна линија дополнителни 30.000 евра еднократно. Плус, за секој патник којшто ќе заминува ќе има дополнителна поддршка на таквата компанија од 9, 8, или 7 евра, така што ќе биде една сериозна поддршка од владата со цел зголемување на бројот на туристи. Паралелно со тоа, на македонските граѓани ќе им се отворат нови авиолинии и нови можности за патување на полесен начин, на побрз начин и на многу поевтин начин отколку што тоа го имаат во овој момент“, изјави премиерот Груевски, кој очекува новите линии да започнат со работа во ноември или декември.
Меѓу другото, Груевски најави и нов закон за автокампови, чија цел ќе биде подобрување на условите во летните кампови во земјата. Доколку се донесе според предвиденото во јуни или јули, тој ќе започне да важи од следната летна сезона.
„Ова ќе внесе нов квалитет. На некој начин тој што ќе сака да има камп, ќе мора да вложи малку повеќе, да го направи малку подостоинствено од тоа што е сега со цел да се привлечат повеќе туристи“, изјави премиерот Груевски.
OhridNews
извор:„Макфакс“
