Општина Охрид деновиве писмено била известена од Владата дека се одбива нејзиното барање за кредитно задолжување во комерцијалните банки, што според одлуката на Советот требаше да се искористи за сервисирање на старите долгови, кои се единствената пречка за влез на локалната самоуправа во втора фаза од децентрализација.
Ваквата одлука според градоначалникот Петрески е уште една потврда дека Охрид има “специјален негативен статус кај Владата“.
-Охрид е под класично економско ембарго од централната власт како она што Грција и го воведе на Македонија своевремено. Не ни даваат согласност ниту кредит да подигнеме за да ги платиме старите долгови кои ВМРО ДПМНЕ ги направи. Нас не ни даваат, а тие на секои 15 дена земаат по триесет милиони кредит за да исплатат пензии или друго нешто да направат.-вели Петрески.
За градоначалникот несфатлив е ваквиот потег на Владата, затоа што општината ги исполнува потребните услови за добивање кредит.
-Една година не играат и ни кажуваат донесете една па друга одлука. Се направивме, ги променивме одлуките во Советот и едногласно донесовме заклучок за кредитно задолжување, го намаливме и износот на кредидот од 6 на 4 милиони евра како што ни беше укажано и отатко направивме се што побараа ни стигна писмо дека сме одбиени.-објаснува Петрески.
Неодмна општина Охрид ја посети министерот за Локална самоуправа Невзат Бејта, кој истакна дека приоритет на Владата е на општините кои имаат проблеми, како Охрид, да им се помогне да влезат во втора фаза од децентрализација. Тој рече дека лично ќе се заложи тоа да се случи и дека ќе ја информира Владата за состојбата во која се наоѓа општината и напорите кои таа ги презема за сервисирање на старите наследени долгови, со цел да се изнајде решение за градот Охрид, кој останува и натаму во прва фаза од децентрализација заедно со Делчево, Виница, Желино, Вранешница и Пласница.
