Градоначалникот Георгиески на својата турнеја во Белград ја предаде историски вредната ограда од вилата „Билјана“, во време кога Охрид и граѓаните тонат во сериозни проблеми, а недостасува и вниманието за нашето културно богатство. Вака на гестот што се случи денеска во Белград гледа опозициската ВМРО ДПМНЕ.
Што добија Охрид и Македонија за возврат од тоа што Георгиески зад флоскулата на пријателство ја однесе оградата? Дали Георгиески знае дека пријателството е двостран однос и дали во знак на пријателството од Белград ќе се врати со златните маски од Требеништа како и со охридските длаборези што ги красат тамошните институции и музеи? – прашува ОК ВМРО ДПМНЕ Охрид.
ВМРО-ДПМНЕ ОК Охрид најави дека ќе се обрати до Управата за заштита на културното и историско наследство, Министерството за култура, и МНР, со единствена цел „изнесувањето на културни артефакти од Македонија да не биде само самоволен чин на еден градоначалник, туку осмислена државна политика од која заслужена корист ќе има и Охрид и Македонија“, стои во партиската реакција.
OhridNews
