– Во услови кога Петрески знае дека го чека сигурен пораз на престојните локални избори и во услови кога ги брои последните денови како градоначалник, Локалната самоуправа на тендер издава под закуп за период од 5 години градежно изградено земјиште, паркинзи од втора и трета паркинг зона, со што безмалку во целото градско подрачје ќе се наплатува паркирањето . Со ваквиот чин на објавување на тендер за паркинг простори низ целиот град логично е да се постави прашањето: Дали Александар Петрески на крајот од својот мандат е приморан и ги расчистува должничкодоверителските односи со своите бизнис тајфи ? Прашуваме уште колку вакви тендери Александар Петрески ќе објави во неговите последни 60 дена како градоначалник на Охрид за да им се оддолжи на своите блиски бизнис пријатели, праша на денешната прес- конференција портпаролот Никола Митровиќ.
Од ВМРО- ДПМНЕ додаваат дека Петрески пред да си замине од позицијата градоначалник на општина Охрид им нанесува огромна штета на граѓаните, но и на туристичкиот имиџ на градот, и дека тоа го прави исклучиво во интерес на луѓе блиски СДСМ кои треба потоа дел тие средства да ги уплаќаат за кампањите на СДСМ.
– Граѓаните ќе го казнат неговото неодговорно работење. Бидејќи е свесен за тоа тој во последните два месеце распишува наводни вработувања и распределби во Општината кои немаат законска основа согласно систематизацијата, сега започнува да врши и раскрчмување на јавните паркинг простори со што на долг рок им штети на граѓаните на Охрид, но и на сите туристи кои го посетуваат, рече Митровиќ.
