Советничката група од СДСМ заедно со советниците од ВМРО- Народна партија и коалиционите партнери вчера изгласаа срамни одлуки со кои директно се задира во буџетот на граѓаните . За среќа, како советничка група успеавме да издејствуваме од дневен ред да се симнат точките околу поскапувањето на гробарината и срамниот кредит на ЈП Нискоградба, истакна претседателот на општинската ВМРО- ДПМНЕ, Атанаско Михаилов на денешната прес- конференција на која присуствуваа и советниците од оваа партија.


– Објаснувањата за поскапувањата на цената на водата се ноторна лага и имаат сосем друга заднина. Петрески е седум години градоначалник и зошто досега не ја поскапи водата ако со тоа беше обврзан поради склучени договори, туку тоа го прави сега. Причините се подготовките за продажба на МЈП Проаква, кои  градоначалникот ги прави заедно со колегата од општина Струга за продажба на приватен партнер со тоа што ќе му овозможат за 20% поскапа вода, отпуштање на вработените во јавното претпријатие како идниот партнер би можел да избира со кого ќе работи. Ова е класична форма на договарање против интересите на граѓаните, рече Михаилов.

Како што потенцира претседателот на ОК на ВМРО- ДПМНЕ, лага се и објаснувањата околу поскапувањето на цената за одведување на отпадни води. 

– Причината е иста- подготовки за продажба и покривање на трошоците кои ги прави менаџментот на јавното претпријатие за потрошени средства за репрезантација и мобилна телефонија. Петрески и неспособните директори, својата неспособност сакаат да ја покриваат со пари од граѓаните, рече Михаилов.

Тој запраша, ако поскапувањето на комуналните услуги се објаснува со поскапувањето на нафтата, тогаш зошто комуналните услуги пред три години, кога цената на нафтатата се намалила за 30%, не дошло и до намалување на цената на комуналните услуги за 30%.

Советниците запрашани, зошто вчера ја напуштија седницата и не ги сослушаа аргументите на мнозинството, со одговор:

– Кои аргументи треба да ги чуеме  кога 3 години мнозинството во охридскиот совет не излегува со аргументи, туку само дига рака за секакви одлуки. Кои аргументи да ги чуеме кога единствени аргументи на локалната и мнозинството се манипулации , навреди и неприфаќање на ниту една конструктивна критика. Кои аргументи, кога три дена укажуваме на лошите одлуки за подигање на цените, а тие не сакаа ни да послушаат. И на крај кои аргументи кога СДСМ излезе со наводен Проект за субвенции кон економски загрозените граѓани од кризата , а го ставија во буџет под наводни субвенции кон јавни претпријатија. Сега спротивно од тоа воведуваат повисоки давачки. Не постојат нивни аргументи само манипулации кои како советници немаме намера да ги слушаме и да им даваме алиби, рече координаторот на советничката група, Дејан Паноски.
OhridNews