Коалицијата „За подобра Македонија“ предводена од ВМРО-ДПМНЕ ќе раководи со вкупно 56 општини и во Градот Скопје. Во вториот изборен круг оваа коалиција победи во Скопје и во уште 16 други општини, соопшти на прес конференција премиерот и лидер на владејачката партија Никола Груевски. Тој посочи дека освоените 445 илјади гласови, речиси 40.000 повеќе од претходните локални избори, претставуваат историска победа на ВМРО-ДПМНЕ и коалицијата „За подобра Македонија“.
– На овие избори освоивме еден градоначалник повеќе. Ова е порака до сите нас дека со работа, труд, искрен однос и одговорност кон она што се работи може да се продолжи со успеси. Ако се одржи зборот што го давате, се направат резултати и се исполнат ветувањата и доколку се има искрен однос кон народот, граѓаните знаат да го ценат тоа и да го наградат трудот на тој што дава се што е во негова моќ, истакна Груевски.
Груевски изборите ги оцени како слободни и демократски на кои, како што рече, победиле делата и остварените ветувања.
