Околу 30.000 илјади гости по слободна проценка престојуваат во нашиот град. Што би се рекло двојно повеќе жители има Охрид деновиве. Тоа се одразува врз сообраќајот (гужви, зголемен број сообраќајки), врз снабдувањето со вода и електрична енергија (максимално оптоварени сите капацитети), но се чини најкатастрофална е ситуацијата со хигиената односно екологијата. Едноставно, може да се каже дека се давиме во ѓубре. Нема контејнер во градот што не е преполн (а кај многу и „прелива“ ѓубрето надвор), улиците и парковите се гнасни, отпадоци, пластика, стакло, на секој чекор.


Наведнати од тежина – населба „Христо Узунов“


Кому му е гајле за забраната!?

Се добива впечаток дека колку и да чистат комуналците, не може да постигнат колку гостите и домашните можат да извалкаат и загадат. Негрижата оди до крајни размери. Кај „Дон Вито“ односно до поранешната продавница на „Охридска трговија“ поставена е табла на која пишува дека се забранува фрлање ѓубре. Но, кого тоа го интересира?! Има два кубика ѓубре. Понекогаш ни доаѓа да си поставиме прашање – зошто ни се вакви туристи?! Да бидеме искрени и домаќините не се поарни.

Спаско Костоски