Во голем пожар, кој вчеравечер околу 19.15 часот избувнал во штала во селото Долно Средорече, Дебрца, предизвикана е голема материјална штета.
Како што информираат од охридската Противпожарна единица, во пожарот кој поради ветрот се ширел со голема брзина биле зафатени плевна, штала, 400 бали сено, бил оштетен еден трактор, машини, а огнените јазици го зафатиле и добитокот кој се наоѓал во шталата- три крави и едно теле.
Во гаснењето на огнената стихија, Противпожарните единици интервенирале со две возила и седум пожарникари, но како што оттаму потенцираат, не можело многу да се направи за да се спаси добитокот и заштитат машините, поради оддалеченоста на селото и брзината со која се ширел огнот.
Се утврдуваат причините поради кои дошло до избивање на пожарот.
OhridNews
