Охрид е тотално небезбеден во случај на пожар на јавен простор. Во градов нема услови за брза интервенција , затоа што со лупа да ги бараш нема да најдеш хидрант на јавна површина на простор од еден километар. Во Охрид има само три нови хидранти, но и тие не работат со полна пареа вели Стевчо Речкоски од работна единица Водовод – Охрид.
-Моментално во градов, на три места ПРОАКВА има инсталирано хидро системи од кои што два се на Булеварот Туристичка: едниот спроти хотелот Дончо а другиот спроти хотелот “Монтенегро “. Третиот е на улицата “Асном“. Од трите хидро системи тој што е кај Монтенегро се пушта во употреба повремено поради намалениот притисок на водата во тој дел од градот. Другите два хидро системи се инсталирани и се во ред но не се ставени во функција– истакнува Речкоски
Во градов постојат уште три други хидросистеми за гасење пожар: на Сараиште, кај Поштата и кај Спортската сала Атина Бојаџи. Но и овие површини не се заштитени од оган. Инсталираните хидранти години наназад не работат. Најкритична е состојбата со опожарувањето во Стар Град, таму не само што не постојат транспортери на вода, туку и тесните сокаци не дозволуваат слободен пристап на противпожарните возила до критичното место.
Од Охридскиот Водовод за OhridNews потврдија дека хидрантите на јавни површини во градов не работат и во најскоро време неопходно е да се инсталираат нови.
А.Б.
