Во организација на Општина Охрид и Словенечко- македонскиот бизнис клуб, на 27- ми септември 2011 година, во Охрид ќе се одржи Бизнис ден за промоција на македонското и словенечкото стопанство.
Словенечко- македонскиот бизнис клуб е дел од македонската бизнис заедница веке 7-ма година, четврта година по ред е партнер со словенечката Јавна агенција за странски инвестиции и претприемништво ЈАПТИ, како и со словенечкото Министерство за економија, а во него членуваат над 130 словенечки и македонски компании.
Поради развивање на стопанската соработка помеѓу двете држави и поврзување на заедничките интереси, Словенечко-македонскиот бизнис клуб во рамки на ова партнерство реализира проект за промоција на словенечкото и македонското стопанство- “ Бизнис денови низ Македонија “.
Тоа се еднодневни активности составени од промотивен работен дел, каде Клубот и Општината имаат свое претставување пред менаџерите на компаниите-членки на Клубот и пред менаџерите на компаниите регистрирани во Општината и саемски дел каде компаниите- членки на Клубот и компании од Општината, на промотивни штандови ги претставуваат своите производи и услуги.
