Граѓаните на Македонија и Србија, наскоро границата помеѓу двете држави ќе ја минуваат само со биометриска лична карта.
Договорот за олеснување на граничните формалности синоќа во Охрид го потпишаа министрите за внатрешни работи Гордана Јанкуловска и Ивица Дачиќ, на маргините на форумот на министрите за правда и за внатрешни работи ЕУ-Западен Балкан. На сила тој ќе стапи по ратификацијата во парламентите на двете држави.
-Овој договор е само потврда за тоа дека државите кои имаат добрососедски односи, секогаш може да ја унапредуваат соработката и да ги олеснат процедурите за поминување на државните граници меѓу земјите, како тоа што го направивме со Република Србија, а истовремено да се задржат неопходните безбедносни стандарди, изјави министерката Јанкулоска.
Нејзиниот српски колега исто така позитивно го оцени договорот, кој, како што рече, пред се е во интерес на граѓаните.
– Овој договор во прв ред е во корист на граѓаните кои ја минуваат границата, со тоа им го олеснуваме патувањето и сметам дека тие подобро се чувствуваат кога не мора да носат пасоши, туку границата можат да ја преминат само со лична карта, рече Дачиќ.
