Жителите на Трпејца, деновиве одржаа мирен протест на кој го искажаа незадоволството од односот на институциите на локално и централно ниво во решавање на спорот што тие го имаат со сопствениците на приватен сместувачки капацитет изграден на крајбрежјето. Тие тврдат дека делови од објектот се изградени на државно земјиште каде селаните имаат подигнато мал параклис бидејќи го сметаат за свето место, што било констатирано од Градежната инспекција, која уште минатата година донела решение за уривање на нелегалните градби, но истото се уште не е спроведено.
Од општина Охрид информираат дека ја почитуваат одлуката на надлежниот инспекторат, и ќе постапат според важечките закони, но не само за конкретниот случај, туку ќе бидат урнати сите дивоградби во Трпејца што не можат да се легализираат, а такви според локалната самоуправа има околу педесет.
