Претседателот на Европската комисија -ЕК, Жозе Мануел Баросо и еврокомесарот за проширување Штефан Филе, утрово со специјален лет пристигнаа на аеродромот „Св. Апостол Павле“, од каде се упатија кон вилата „Охрид“ на средби со македонскиот државен врв.

Во тек е тет-а-тет средбата помеѓу претседателот на ЕК, Баросо и македонскиот премиер Никола Груевски, по што ќе се одржи пленарна средба на делегациите. Централна тема на разговорите ќе биде европската перспектива на земјата, усогласување на законодавствата и реформите во критичните сектори, како и решавањето на спорот за името, кој се смета за најголема пречка на патот на Македонија кон ЕУ.

Портпаролот на Баросо, Микаел Карничниг во изјава за Дојче веле вчера рече дека претседателот на Европската комисија при посетата на Македонија посебнно ќе инсистира на потребата од еден вид историски договор меѓу различните политички сили и на култура на компромис заради европска интеграција на земјата.

Пораката што од Брисел ја носи Баросо ќе биде соопштена на прес конференција во хотелот „Инекс Горица“, каде попладнево претседателот на ЕК, ќе одржи предавање на европските перспективи на Македонија. На агендата на Баросо уште се и средбите со лидерот на ДУИ, Али Ахмети и на СДСМ, Бранко Црвенковски, со што високата делегација на ЕУ официјално ќе ја заврши балканската турнеја.

Г.М.