Вредни историски експонати пронајдени во водите на Охридското Езеро !

03.11.07 15:30

Редок примерок на пушка „даљанка“ од 18.век, и други вредни историски експонати се пронајдени во подводното депо кај Сараиште, каде денеска започнаа активности за вадење на оружјето од водите на Охридското Езеро.

_{пушката „даљанка“ откриена во Охридското Езеро}

Оружјето во Охридското езеро најверојатно го оставиле Турците кои на тој начин се ослободувале од него, изјави Никола Целаковски, историчар и кустос во охридскиот Завод и музеј.

Пронајдени се фрагментти од пушки, кубури и шлемови кои потекнуваат од 18., 19. и 20.век, меѓу кои има вредни историски експонати, вели Целаковски.

Пронајден е примерок на пушка даљанка од 18.век, која е долга 2,8 метри. Моите сознанија говорат дека на просторите на поранешна Југославија се пронајдени само два примероци од ова ретко орудие, еден е сместен во воениот музеј во Белград, а вториот е овој откриен во Охрид, додава Целакоски.

Оружјето е пронајдено на околу 300 метри од брегот, во длабочина на околу пет до осум метри. Случајно го открил нуркачот Боби Горичан при подводно истражување минатата година. „Оружјето е покриено со седимент и за жал е измешано со ѓубре кое го има во големи количини под вода“, изјави Горичан. Досега од Охридското Езеро се извадени стотина пушки, кубури кои се конзервираат и чуваат во охридскиот Завод и музеј, а под вода има уште оружје, вели Горичан.

Членовите на Клубот за подводни активности од Охрид денеска започнаа со вадење на оружјето од подводното депо кај Сараиште.

„Најпрвин ќе ги обележиме крајните граници на депото на оружје, по што следува пребарување на теренот“, ни изјави Милутин Секулоски, меѓународен инструктор по нуркање. Местата каде ќе биде пронајдено оружје ќе ги обележиме и фотографираме, по што тоа ќе биде извадено, додава Секулоски. Тој информираше дека сите нуркачи кои се вклучени во акцијата имаат завршено курс за подводна археологија и дека пронајденото оружје не претставува опасност како по нив така и по капачите.