Врвни балкански уметници изминативе осум дена, во манастирскиот комплекс “Свети Наум”, твореа во рамки на четвртата Меѓународна ликовна колонија „Балкан спирит“. Оваа колонија, годинава беше посветена на 1.100 години од упокојувањето на Свети Наум Охридски.
Според организаторите, колонијата е едно отворено ателје каде што уметниците можат да се дружат и да градат заедништво, далеку од дневната политика. Нејзина цел е да се зајакне регионалната соработка и да се покаже убавото лице на Балканот.
Во рамки на колонијата учествуваа уметниците: Анастас Костадини-Тасо од Албанија, Светлин Русев од Бугарија, Светлана Драгоевиќ од Црна Гора, Миодраг Д. Јелиќ од Србија, Еркан и Дениз Оздилек од Турција и Бернхард Холеман од Австрија и македонските сликари Данчо Ордев и Данчо Клчев, Петар Попчев, Павле Кузмановски, Горјан Ѓоргиев, Мирослав Масин, Стефан Хаџи Николов и Решат Амети. По завршувањето на колонијата ќе биде отпечатен каталог на англиски јазик, а делата ќе бидат претставени на изложба.
Одржувањето на оваа манифестациа која е во организација на Фондацијата за стратешки истражувања „Киро Глигоров“ и Асоцијацијата за култура ИКОН од Скопје беше поддржана и од Министерството за култура и од Амбасадата на Норвешка во Македонија.
