Двајцата директори во јавните здравствени установи ќе се третираат еднакво. Тоа значи нема прв и втор директор, туку тие ќе бидат третирани како работоводен орган на установата, изјави денес министерот за здравство, Никола Тодоров. Новина е што вториот директор (економист) ќе биде оперативен, односно организациски директор, кој ќе се грижи за оперативниот дел на функционирањето на здравствената установа, истакна Тодоров.
Тој посочи дека двајцата директори заеднички се надлежни и одговорни за изготвување предлог план за јавни набавки и доставување до Управниот одбор на ЈЗУ за негово донесување, планирање, одлучување, потпишување договори за јавни набавки, следење и нивна реализација, вработување, престанок на работниот однос, распоред на здравствените работници и здравствените соработници во смени, определување групи за работа, како и за донесување решенија за наградување на вработените во ЈЗУ.
– Самостојна надлежност на медицинскиот директор е организација на работата на здравствените работници, а на организацискиот директор – организација на вработените во ЈЗУ кои не се здравствени работници и соработници, контролата за нивно почитување на работното време, поведување дисциплинска постапка, изрекување казни за повреда на прописите за вработените кои не се здравствени работници, материјално – финансиското работење и сметководство на ЈЗУ, рече Тодоров.
Во надлежност на организациските менаџери, посочи тој, е и обезбедувањето и одржувањето хигиенски и инфраструктурни услови за работа во ЈЗУ, одлучување за правата и обврските кои произлегуваат од работниот однос на вработените, снабденоста со потрошни материјали, наплата на сопствени приходи на ЈЗУ, како и на учеството на осигурениците со лични средства во цената на здравствените услуги во ЈЗУ.
