За една недела на инфективното одделение при охридската Општа болница евидентирани биле околу 50 пациенти, заболени од грип. Кај еден пациент на 38- годишна возраст  утврдени се симптоми на грип со тешка клиничка слика, поради што пациентот бил испратен на Инфективната клиника во Скопје .

 Од инфективното одделение потенцираат дека независно од типот на грипот, во исходот од лекувањето во голема мера влијае претходната физичка состојба и клиничка слика на пациентот.

Препорачуваат да се следат препораките дадени од страна на надлежните. Согласно заклучокот од Комисијата за следење на сезонски грип, Државниот санитарен и здравствен инспекторат (ДСЗИ), со решенија ги задолжи училиштата и градинките за да ги преземат потребните превентивни санитарно-хигиенски мерки (како  што беше случај и во претходните години). Станува збор за санитарно-хигиенски и противепидемиски мерки според кои, треба да се  врши континуирана засилена хигиенизација во објектите (особено во деловите каде престојуваат учениците/децата), задолжително проветрување на просториите каде престојуваат учениците/децата, за време на одморите (повеќе пати во текот на денот), обезбедување доволни количини средства за дезинфекција и да се врши зачестена дезинфекција на опремата и просториите во објектите, воспоставување евиденција за отсутни ученици/деца, а зголемениот број отсутни задолжително да се пријавува во подрачните единици на Државниот санитарен и здравствен инспекторат, да се врши редовно здравствено информирање на учениците во врска со начинот на пренесување и заштитата од грип и да не се примаат ученици/деца со симптоми на инфекција на респираторни патишта.

Според последните податоци од министерството за здравство, за време на викендот биле регистрирани петмина нови заболени од грип. Тројца од нив, со вирус на грип од типот А (Х1Н1) се хоспитализирани на Клиниката за инфективни болести и се во добра општа состојба. Два позитивни случаи со А (Х1Н1) се од болницата во Куманово, од кои едниот пациент се лекувал амбулантски, а вториот бил задржан на болничко лекување и во моментов е во добра општа состојба.

Во лабораторијата на Институтот за јавно здравје досега вкупно се анализирани 38 примероци, од кои 13 лица се позитивни на  вирусот на грип од тип А (Х1Н1), тројца се со тип на вирус А (Х3Н2), а двајца се нетипизирани (почнале со терапија).

На Инфективната клиника во моментов има 11 хоспитализирани пациенти со грип, од кои двајца се на Одделението за интензивно лекување, при што еден пациент на возраст од 38 години е во посериозна здравствена состојба. Останатите хоспитализирани се од сите возрасни групи, најголем дел од нив се со претходни хронични заболувања.