За време на претстојниот празник на светиот Климент Охридскиот Чудотворец, св. Седмочисленици и св. вмч. Пантелејмон, ќе има богослужба во манастирот посветен на овој голем светител на Плаошник во Охрид, со почитување на здравствените протоколи за заштита и спречување на ширењето на вирусот Ковид 19, информира Дебарско-кичевската епархија.

На 08 август во 19.00 часот ќе биде отслужена Вечерна богослужба, а во 21.30 часот ќе биде отслужен Акатист на св. Климент Охридски. На 09 август, во 07.30 часот ќе започне Утрената богослужба, а пречекот на Митрополитите Тимотеј и Пимен и на Епископот Партениј ќе биде во 08.45 часот. Светата архиерејска Литургија ќе започне во 09.00 часот, известува Дебарско – кичевската епархија.

Како телесно-духовни битија, ние сме должни да се грижиме за нашето здравје, секако, и за телесното и за духовното. Токму затоа, и овој пат апелираме за почитување на мерките од Владата, зашто и Црквата е дел од оваа држава и се грижи за здравјето, телесно и духовно, на сите верници и на сите луѓе. Затоа сметаме дека со нашето внимание и со грижата за себе, но, пред сѐ, со грижата за нашите ближни, можеме да придонесеме во голем дел што побрзо да се ослободиме од искушението што го напаѓа човечкиот род. Затоа, поради настанатата состојба со корона вирусот КОВИД-19, ги известуваме верниците кои сакаат да дојдат во манастирот и да се помолат на големиот светител, дека ќе мора да се придржуваат кон мерките на Владата за спречување и ширење на вирусот, што подразбира носење на заштитна опрема (маска, марама, шал и слично), како и држење на определеното растојание. – соопшти Дебарско-кичевската епархија.

Од Црквата информираат дека и оваа година моштите на патронот на МПЦ – ОА, ќе бидат отворени за поклонение на верниот народ. Но, поради опасноста од заразната болест, Дебарско-кичевската епархија апелира до верниците да се воздржуваат од целивање, а секој кој ќе пристапи кон моштите ќе добие памук натопен со невидливата и исцелителна благодат од светите мошти.

Се надеваме дека верниот народ ја разбира нашата грижа, особено што ова е грижа, пред сѐ, за нив, за нивното здравје и за нашата иднина. Господ, нашиот Бог, по молитвите на светиот Климент Охридски, да нѐ избави од сите искушенија и да ни дарува здравје, мир и голема љубов, та победувајќи го невидливиот непријател, уште повеќе да ја зацврсти нашата вера и да нѐ сплоти како народ, кој верно ќе им служи на Црквата и на Татковината. – стои во соопштението. на Дебарско-кичевската епархија.

OhridNews