За рибниот фонд во Охридското Езеро треба да се грижи државата сметаат охриѓани.
Во анкетата што ја спроведе OhridNews, 54 отсто од читателите се изјаснија дека државата треба да се грижи за Охридското Езеро и рибниот фонд, 39 проценти се на мислење дека тоа треба да го прави општината, а најмалку, или 7 отсто, концесионер.
Во анкетата беа вклучени 2284 читатели.
Научниците од Хидробиолошкиот институт укажуваат дека бројноста на рибниот фонд, пред се на ендемските видови белвица и пастрмка е во опаѓање, за што според нив најголема вина има човекот, кој и покрај забраната продолжува незаконски и неселективно да ја лови оваа риба, со што се намалува нејзиниот природен прираст.
Оттаму посочуваат дека доколку драстично и брзо не се промени свеста кај луѓето и не се преземат конкретни мерки за заштита на рибниот фонд на пастрмката, постои голема опасност таа да исчезне од Охридското Езеро, што ќе има несогледливи последици врз целокупниот екосистем.
