Зачестени контроли на ревирот „Слив на Охридско езеро“ и рекреативните зони

Викендов,  Државниот инспекторат за земјоделство (одделение за инспекциски надзор од областа на  рибарство со аквакултура) со седиште во Охрид и преставници на здружението на рекреативни риболовци спортски клуб „Свети Апостол Петар“ од Охрид извршија контрола на риболовниот ревир „Слив на Охридско Езеро“, реките и Белчишкото блато – „Сини Вирој“ и на рекреативните зони „ Слатинско езеро“и „Требенишко езеро“.

При тоа извршена е контрола врз повеќе рекреативни риболовци според Законот за рибарство и подзаконските акти.

Концесионерот на риболовниот ревир и рекреативната зона ЗРРСК „Свети Апостол Петар“ во заедничка соработка со Државниот инспекторат за земјоделство најавуваат зачестени контроли на риболовниот ревир  и рекреативните  зони , посебно во овој период каде според риболовната основа е во тек забрана за лов на пастрмката. Како што потенцираат од „ Свети Апостол Петар“, зачестените контроли ќе допринесат да се заштити пастрмката во периодот на нејзиниот мрест од недозволен риболов.

Забраната за лов на пастрмка започна на 01 октомври 2012, а ќе трае до  28 февруари 2013 година.  Недозволениот риболов е кривично дело за кое се предвидени казни затвор од 1 до 5 години.