Владата треба да изнајде начин како да се одблокира сметката на општина Охрид, и какво и да е решение што ќе го оди во таа насока, СДСМ ќе го прифати. Ова денеска на прес-конференција во Охрид го изјави претседателот на СДСМ, Зоран Заев.
Лидерот на СДСМ истакна дека сметката на општина Охрид е блокирана повеќе од 10 години без било какви реални измени.
„На последните локални избори, ВМРО-ДПМНЕ ја презеде општина Охрид и сега управува со Охрид преку градоначалникот Бакрачески. Ја повикуваме Владата предводена од ВМРО-ДПМНЕ да ги преземе барем обврските и долговите на општината створени од изградбата, доградбата и санацијата на колекторскиот систем за заштита на Охридското Езеро и со тоа да го стабилизира и нормализира работењето на општина Охрид. Се работи за околу 10,5 милиони евра. Секако, ако Владата реши и на друг начин да го реши големиот проблем со кој повеќе од деценија се справува Охрид, ние како опозиција ќе ја поддржиме.“ – изјави Заев.
Претседателот на СДСМ и секретарот на партијата Оливер Спасовски, заедно со локалното раководство денес ќе оствари повеќе средби со граѓани на кои ќе биде претставена програмата на СДСМ за враќање на средната класа. Партијата денес во Охрид објави три мерки поврзани со децентрализацијата на власта. Првата мерка се однесува на центрите за социјални работи, втората на децентрализација на примарната здравствена заштита, а третата предвидува децентрализација на Секторот за јавен ред и мир од МВР кон општините.
„Ова се само три од дваесеттината мерки за децентрализација на власта од програмата на СДСМ за кои во иднина ќе дискутираме и дебатираме.“ – истакна Заев.
OhridNews
