Конечно треба да престанеме со предвремени избори, тие ги стопираат производствените капацитети и севкупната македонска економија, изјави денеска премиерот Зоран Заев во Гевгелија, како одговор на барањето на лидерот на опозициската ВМРО-ДПМНЕ Христијан Мицкоски за предвремени парламентарни избори.
Државата, вели тој, има јасен правец по кој се движи, односно, како што рече, европеизацијата продолжува.
Сите тешки одлуки што се донесоа во минатото беа заради економскиот стандард на народот, заради отворање нови работни места, да ги мотивираме ваквите инвеститори да инвестираат во нови инвестиции, да отвораат работни места, да го зголемуваат својот извоз, бруто домашниот продукт на државата, а со тоа и благосостојбата на целиот народ, рече премиерот.
Секое предвремено истрчување на избори, според него, ги кочи ваквите процеси.
Затоа редовните избори се во 2024 година и треба да опстоиме на тоа, а дотогаш треба буквално сите, почнувајќи од мене, претседателот на државата, извршната власт, општините, но и сите наши граѓани, да ги засукаме ракавите и да работиме. Само така ќе имаме голема плата, само така ќе има поголеми инвестиции, само така ќе има поголем извоз и само така ќе донесеме поголема среќа за целиот наш народ, заклучи Заев.
Претседателот на ВМРО-ДПМНЕ Христијан Мицкоски, пак смета дека треба што поскоро да се одржат предвремени парламентарни избори, бидејќи владиното мнозинство е нестабилно, мало и тенко, а Македонија е хибриден режим и е заглавена во корупција
Час поскоро треба да има предвремени парламентарни избори, ново, стабилно владино мнозинство кое со многу работа, бидејќи нема веднаш да дојдат придобивките преку ноќ. Треба многу работа, многу откажување, чесни луѓе и чесни политичари кои не се огрешени и зглавени во криминал за да можеме Македонија да ја извадеме на прав пат, рече Мицкоски. Додаде дека се работи, да се почека и дека се можни предвремени парламентарни избори заедно со локалните.
OhridNews
