Започна изградбата на источната трансферзала

Во месноста Бејбунар денеска на свечен начин беше означен почетокот на изградбата на источната трансферзала која во голема мерка треба да го растовари одвивањето на сообраќајот во Охрид, особено во летната туристичка сезона. Во првата фаза ќе бидат изградени 850 метри од бензинската пумпа Билјанини извори до Бејбунар и уште 150 метри од тука  до ул. „Баталјон Мирче Ацев“.

Почетокот на работите гo означи градоначалникот на Охрид, Александар Петрески, кој истакна  дека до крајот на оваа година улицата ќе биде пробиена и пошљунчена, а догодина истата ќе биде асфалтирана.  „Оваа улица е од големо значење не само за граѓаните кои гравитираат во овој дел на градот, туку и за туристите кои ќе патуваат од плажите кон Битола, со што во многу ќе се растовари сообраќајот на лето“, рече Петрески.

Тој напомна дека покрај оваа улица, годинава ќе биде пробиен и патот од старата автобуска до „Туристичка“, ќе биде завршена улицата „Живко Чинго“, а ќе биде изградена и новата улица помеѓу Жито Леб и Монополот која ќе ги поврзе населбите 15 Корпус и Видобишта. Петрески во изјава за медиумите најави и завршување на канализационата мрежа и колекторскиот систем во Велгошти, Лескоец и Пештани со што како што рече, Охрид 95% ќе биде опфатен со канализација.

Ohridnews