Дното на Охридското Езеро наредните 35 дена интензивно ќе се расчистува од неексклодирани убојни средства, во рамките на акцијата што ќе ја спроведува екипа за подводно деминирање на Дирекцијата за заштита и спасување. Станува збор за втора фаза од акцијата што почна лани, со финансиска поддршка на американската Влада и Меѓународната фондација за заштита од мини „ИТФ“ од Словенија.


Како што појасни Лидија Бјелица, раководител на Сектор во Дирекцијата за заштита и спасување, акцијата ќе се одвива на повеќе локации каде се работеше лани, од каде ќе се извлекува преостанатиот потенцијално опасен материјал. Според работниот план, обучените нуркачи во текот на шест дена ќе ги вадат неексплодираниот материјал од дното на езерото, додека во неделите пронајдените експлозивни средства ќе се уништуваат. Во тек се активности за лоцирање на експлозивните средства, по што деновиве ќе започне нивно извлекување.


 
Бјелица уште истакна дека во акцијата овојпат ќе се користи специјална опрема за подводно детектирање и извлекување на опасниот материјал.

– Акцијата е предвидено да трае до 20-ти април. Покрај опремата што е донирана минатата година, годинава добивме два подводни детектори и мамут пумпа со што ќе можеме поефикасно да ги лоцираме и извадиме неексплодираните убојни средства.-рече Бјелица.


Акцијата, како што истакна Бјелица, е од исклучителна важност за Охридското Езеро, како светско природно наследство, заштитено од УНЕСКО.

– Овие експлозивни средства се наоѓаат тука речиси сто години, така да им се познати како на охриѓани, така и на пошироката јавност и до сега се нема случено никаков инцидент, што не значи дека тука треба и да останат. -посочи таа.

Во првата фаза од акцијата што започна минатата година, од Охридското Езеро беа извадени 7.3 тони неексплодирани убојни средства, што датираат од периодот на Балканските и двете светски војни. Опасниот материјал беше уништен на воениот полигон „Криволак“.

Г. Момироски