При вршење на надзор од страна на Државниот инспекторат за земјоделство (одделение за инспекциски надзор од областа на рибарството со аквакултурата) – Охрид со логистичка подршка на П.С за Г.Н “Охридско Езеро”, вчера на потегот од Охрид до селото Трпејца, констатирани биле повеќе неправилности кај рекреативни риболовци кои вршат рекреативен риболов од кајче (влечење на блинкери).
При надзорот во водите на Охридско Езеро затекнати биле 5 лица кои вршеле рекреативен риболов со блинкер, без дозвола од концесионерот и едно лице кое вршело рекреативен риболов со риболовни средства – блинкери повеќе од дозволените согласно риболовната основа на Охридско Езеро.
Против лицата ќе бидат поведени соодветни постапки. На сите, од страна на Државниот инспекторат за земјоделство – Охрид, ќе им биде понудена постапка за порамнување, при што ќе им бидат издадени платни налози и доколку во рок 8 дена од издавањето не бидат платени ќе бидат поднесени соодветни Барања за поведување на прекршочна постапка до Основен Суд во Охрид.
Од Државниот инспекторат за земјоделство, информираат дека е неопходно сите рекреативни риболовци, при вршење на рекреативен риболов (без разлика дали истиот го вршат од брег или од кајче), да поседуваат важечка рекреативна легитимација издадена од Македонска риболовна федерација и рекреативна дозвола издадена од концесионерот на рибниот фонд од соодветната риболовна вода каде ќе бидат затекнати. Во овој случајот на Охридско Езеро рекреативна дозвола од ПАСТРМКА 2012 д.о.о.е.л .
Од Државниот инспекторат за земјоделство (одделение за инспекциски надзор од областа на рибарството со аквакултурата) – Охрид и концесионерот ПАСТРМКА 2012 д.о.о.е.л ги известуваат сите риболовци дека ќе се интензивираат контролите на Охридско Езеро, при што нема да се толерираат никакви прекршувања на Законот за рибарство и аквакултура и подзаконските акти од истиот, и притоа нема да има толеранција ниту за рибокрадците, ниту за риболовците кои риболоват без риболовна легитимација и дозвола.
