Поради повреди на постапките и прекршување на Законот за катастар на недвижности, на тројца вработени им е изречен прекин на договорот за вработување, а на триесет вработени од одделенијата во Тетово, Гостивар, Велес, Скопје и Свети Николе им се изречени дисциплински санкции. Воедно против осум лица од кои пет од Одделението за катастар на недвижности во Велес поради основано сомневање дека грубо го повредиле законот во тек се дисциплински постапки, по кои ќе им бидат изречени најстроги санкции предвидени со Законот за работни односи, соопшти денеска Агенцијата за катастар на недвижности.
Интензивирана е и контролата на приватните геодетски фирми, по што е одземено овластувањето за работа на еден овластен геодет, како и лиценците за работа на три приватни геодетски фирми, две од Скопје и една од Охрид. Против други две фирми, од Скопје и од Тетово, во тек е постапка за утврдување одговорност и санкционирање на сторените повреди во работењето. За сторени полесни повреди во работењето на две фирми од Струга, една од Гостивар и две од Скопје, им се доставени писмени опомени и задолженија за отстранување на неправилностите.
Агенцијата за катастар на недвижности ги повикува граѓаните да пријават неправилност при работата на бесплатниот телефон 0800 80800.
