Во периодот од 4 до 11 мај, инспекторите од Државниот пазарен инспекторат реализирале 2.221 контрола, во трговски објекти на големо и мало во кои спаѓаат и угостителски објекти, аптеки, бензински станици, банки и пошти.
Државниот пазарен инспекторат постапуваше по утврдени неправилности и при тоа се затворени вкупно 5 угостителски објекти во Охрид, Кичево, Тетово и Струмица. За објектите во Охрид и Струмица ќе следуваат и кривични пријави, информираа од инспекторатот.
Директорот на државниот пазарен инспекторат Стојко Пауновски, на денешната прес конференција, апелираше до угостителите да продолжат да се придржуваат на одлуката на Владата и да не ги отвораат угостителските објекти бидејќи забраната за нивно работење се уште е на сила.
„Државниот пазарен инспекторат постапува исклучиво по одлуките коишто ги донела Владата. Согласно ова укажуваме дека се до моментот додека Владата не донесе нова Одлука, Државниот пазарен инспекторат ќе постапува и се што ќе констатира како неправилност ќе санкционира. Мора да напоменеме дека многу објекти се осмелија дури и во полициски час да отвораат и притоа се собираат граѓани. Во вакви случаи постапивме изминатите два дена во Тетово, Врапчиште и во Гостивар“, подвлече Пауновски.
