Земјите од поранешните југословенски републики ќе нудат заеднички туристички производ на трети пазари. Таканаречената Балканска тура која ќе ги опфаќа најдобрите туристички дестинации во регионот ќе се нуди на светскиот пазар најавија претставниците на националните асоцијации на туристички агенции и комори од Македонија, Србија и Хрватска, кои во Струга разговараат околу инцијативата за формирање на „ИСТА“-Интернационални средби на туристички асоцијации од регионот.
–Идејата е пред се на просторот на поранешна Југослација да направиме асоцијација која ќе ги обединува сите асоцијации кои се занимаваат со туризам, не само агенции, туку и хотелиери, авиопревозници и другите субјекти кои придонесуваат кон креирање на квалитетен туристички производ и што е уште поважно за пласман на тој производ, како внатре помеѓу членките, така и кон трети земји, изјави претседателот на Националната асоцијација на туристички агенции на Србија – YUTA, Радисав Станковиќ, инаку предлагач на иницијативата за формирање на „ИСТА“.
Миле Спировски од Комората за туризам на Македонија објасни дека иницијативата покрај од нашата земја засега е прифатена од Србија и од Хрватска, а конкретен интерес има и од Словенија, Црна Гора и Албанија.
– Главна цел на „ИСТА“е создавање на Балкански туристички производ и истиот да го понудиме на пазарот во Кина, Австралија, Индија и САД. Можеби ова некому сега ќе му звучи смешно, но туристите од овие земји не бараат одмор само на едно место туку Балканска тура од 8-12 дена, а тоа не може да го даде само Охрид или Дубровник, туку целиот регион.-истакна Спировски.
Состанокот во Струга е трет во рамки на иницијативата за формирање на ISTA, на која земјите од регионот работат веќе две години. Следниот состанок ќе се одржи во Словенија.
OhridNews
