Охриѓани и туристите кои во вечерните часови  шетаат или седат на клупите покрај охридскиот кеј, не можат да уживаат во убавините на езерото поради силното крекање на жабите, кои според итензитетот на звуците кои ги испуштаат, може да се заклучи дека ги има во голем  број. Граѓаните се сомневаат дека причината за оваа појава која е особено интезивирана во последната седмица е резултат на загадување.

-Мислaм дека годинава има жаби  како никогаш до сега. Непријатно е да знаете дека во езерото има толку многу жаби. Според мене жабите најчесто живеат во мочуришта и сметам дека причина поради која доаѓаат во кајбрежниот дел од езерото е токму загадувањето, коментира еден повозрасен охриѓанец.


Но научните работници не се согласуваат со констатацијата на граѓаните и објаснуваат дека зголемениот број на жаби во крајбрежјето е поради периодот на нивно парење.

-Периодот на парење на жабите е секогаш во овој дел од годината и истите доаѓаат во крајбрежјето  бидејќи во овој дел водата е поплитка и тука  се собира алгата, која исто така цвета во овој период. Периодот на парење трае окоу две недели што значи дека за кратко време ќе запре и крекањето на жабите. Значи не се работи за било какво загадување во езерото и оваа појава се случувала и во изминатите години, вели д-р Сузана Патчева, директор на Хидробилошкиот институт во Охрид.

Таа нагласува дека жабите ретко се предмет на научни истражувања и следења и затоа со прецизност не може да се каже дали оваа година бројот на жабите е зголемен и која е причината за таа состојба.

Е.М