Во текот на обуката, учесничките ќе имаат можност да научат да ги препознаат уништувачите на ефикасноста, да ги анализираат истите и да научат како да се справат со нив. Цел на обуката е и да се препознаваат непотребните работи и да се применуваат соодветни алатки за нивно отстранување. Со обуката ќе бидат опфатени неколку области, меѓу кои : Менаџмент со време и принципи на менаџмент со време, поставување на цели и придржување кон истите, планирање на времето и одредување на приоритети, техники за одредување на приоритети.
– Главната цел на проектот е да им се овозможи на невработените жени од Струга и Вевчани, вклучувајќи ги и селата полесно да се снајдат на пазарот на труд, преку зајакнување на капацитетите на жените за вработување преку разни наменски обуки, студиски патувања и прекугранични средби, велат од ЛАР.
Во рамки на проектот предвидено е да се одржат вкупно 6 обуки до крајот на октомври. По завршувањето на првиот циклус обуки предвидена е посета на жените учеснички од Поградец, кои потоа ќе имаат можност да ја посетат Струга.
Проектот е поддржан од Европската Унија преку ИПА Програмата за прекугранична соработка, а се реализира во соработка со организацијата Уне Груја од Поградец – Албанија. Проектот ќе трае до март 2012 година.
