Најдоцна викендов скопска Апелација треба да одлучи по жалбите на СЈО за неопределувањето мерка притвор за обвинетите во случаите кои ги отвори тимот на Јанева. Тричлен совет судии треба да ги разгледа жалбите и во рок од 48 часа од приемот на жалбите треба да се произнесе, јавива „Макфакс“.
Само во случајот „Титаник“ СЈО поднесе пет жалби на решенијата за притвор за Никола Груевски, Гордана Јанкулоска, Миле Јанакиески, Мартин Протоѓер и за Кирил Божиновски. Од тимот на Јанева се жалат и на одлуките на Кривичниот суд за неопределување мерка притвор за екс-директорот на УБК, Сашо Мијалков, за началникот на Петтата управа, Горан Грујовски, за шефот на кабинетот на министераката Гордана Јанкуловска, Тони Јакимовски, како и за лицата Н.Б. и Н.Н.
Претходно од СЈО соопштија дека се обжалени 6 решенија за притвор, и тоа за две лица во предметот „Тендери“ и за по едно лице во предметите „ТНТ“, „Тотал“, „Триста“ и „Траекторија“, односно за екс-министерката за култура, Елизабета Канческа-Милевска, за градоначалникот на општина Гази Баба, Тони Трајковски, за новинарот и бизнисмен, Драган Павловиќ-Латас, и за помошник-министерот во МВР, Ѓоко Поповски.
Апелација може да ги укине решенијата на понискиот суд, да ги преиначи и да ги врати на повторно одлучување.
OhridNews
