Академикот од НАСА Питер Бок, еден од основачите на Универзитетот за информатички технооги -УИТ „Св.Апостол Павле“ во Охрид, се откажа од проектот кој владата на премиетот Груевски го промовираше непосредно пред последните локални и претседателски избори. Тој обвини за сериозни злоупотреби, политички интриги, лоши услови за работа и заплашување на студентите. За тоа Бок покрај надлежните институции во земјава ја запознал и академската заедници во САД и Европа.
Во отворено писмо Бок ја обвинува новата  управа на универзитетот за отпуштање на странски професори, кои како што тврди, откриле бројни неправилности во работата на универзитетот. Тоа е невистина возвраќа ректорот Данчо Давчев, кој во 2011 година го презеде управувањето на Универзитетот, при што, како што истакна, затекнал бројни недостатоци кои биле воочени и од Државниот просветен инспекторат, како и странски професори  и експерти без докторати, меѓу кои бил и Питер Бок.
-Питер Бок не е компетентна личност  која што треба да одлучува за универзитет во Македонија, затоа што нема докторат на науки, истакна ректорот Давчев. Тој посочи дека по неговото доаѓање на Универзитетот биле разгледани досиејата на секој професор поединечно, при што било утврдено дека еден од професорите нема научен докторат и согласно законот тој не може да биде професор.

-Неколку пати беше побарано од него да достави докторат, но тој не го достави. Исто така беше утврдено дека кај други професори воопшто не била спроведена процедура за избор. Сето ова беше констатирано и од државниот просветен инспектор.-додаде Давчев.


Ректорот Давчев ги демантира обвинувањата

Ректорот Давчев тврди дека оригиналната идеја за формирање Универзитет за информатички технологии во Македонија е негова и на повеќемина други домашни професори и дека истата видоизменета била употребена од основачите на високобразовната институција меѓу кои е и професорот Бок, кој пак ја обвини актуелната управа на универзитетот за плагијат. Давчев ги демантира ваквите обвинувања.

-Тоа е апсолутна невистина, тоа се интриги измислени работи за да се смени ректорот и целокупната нова администрација на универзитетот. За тоа не треба да измислуваат работи јас можам во секој момент да си отидам.-рече Давчев.

На адреса на УИТ стигнаа и обвинувања за непотизам, кои ректорот Давчев исто така ги негира. Според него се работи за ангажман на лица во необразовна дејност, кои биле блиски со лица од наставниот кадар, но тоа било направено за да се консолидира образовната институција.

-Што се однесува до непотизмот, во ситуацијата во која јас се најдов при доаѓањето тука кога немаше доволно луѓе на универзитетот, со договор за дело привремено на неколку месеци ангажирав неколку лица кои требаше да ни помогнат да излеземе од истата. Наследив половина изградена или недоградена зграда, која не можеше да продолжи да се гради поради нерасчистени финансиски работи во минатото, затоа сакав да ги искористам сите расположливи луѓе во Охрид во тој момент. Можеби се случило во даден момент да има маж и жена, односно сопруг и сопруга, меѓутоа тоа беше направено добронамерно со цел да се разрешат проблемите, времено, а не со цел да се остане на работа. Ви се молам советник за инвестиции, ако бил во некакви односи со професор на универзитетот нема тука никаков конфликт на интереси, смета Давчев.


И покрај обвинувањата кои  сериозно може да влијаат на угледот на оваа млада високообразовна институција, универзитетската управа тврди дека установата е на добар пат да ги разреши проблемите, кои според неа се последица од работата на минатото раководство. Според управата на универзитетот тоа ќе било направено и порано доколку навремено била добиена поддршката од надлежните министерства за образование и за информатички технологии. Оттаму пак засега нема официјална реакција во однос на случувањата на УИТ, кој владата амбициозно го најавуваше како проект кој Македонија ќе ја стави на светската карта на научни установи кои продуцираат кадри за 21-от век. Наместо тоа оваа сеуште недокажана високообразовна институција се соочува со проблеми и превирања, што може негативно да се одрази на квалитетот на наставата што ја добиваат студентите, кои очигледно се во сенка на борбата за превласт во универзитетот која трае подолг период.

Горан Момироски