Во саботата, отпочнаа Школата по пливање раководена од искусниот пливач и инструктор – тренер по пливање Соња Думбалоска – Делова и Работилницата по англиски раководена од професор Габриела Неделкоска .
Овие активности предизивикаа голем интерес кај децата, но и возрасните од Трпејца и кај бројните туристи.
Особена атракција за гостите во охридското „Сан Тропе“ е и Вечерната променада – со кајче по езерото. Кајчина осветлени со газиени ламби и факели во саботата вечерта пловеа покрај езерскиот брег во Трпејца,а ученици од ОМУ „Методи Патче“ свиреа дела од класичната музичка литература.
Вчера, во Трпејца гостуваа членови на Нуркачкиот центар „Амфора “ и одржаа одлична презентација пред гостите и трпејчани. Милутин Секулоски, меѓународен иснтруктор за подводно пливање од Нуркачкиот центар АМФОРА, ги потенцираше карактеристиките на нуркањето, како и природните потенцијали на Охридското Езеро и особено регионот околу Трпејца кој е е ден од најинтересните за нуркање.
Вечерва од 20 часот и 30 минути следува уште една музичка прошетка по брегот на езерото, а утре и задутре со најмладите и возрасните во Трпејца ќе се дружи популарниот радио водител и аниматор Жанко Зш. До крајот на културно – забавното лето „На зајдисонце“ во Трпејца, во четврток во 11 часот ќе се одржи и натпревар во кајак на вода со што ќе се возобнови и замрениот кајакарски клуб .
Организатор на манифестацијата е Здружението за промоција и развој За Трпејца со љубов, со поддршка од Месната заедница и Црковниот одбор. Генерален спонзор е општина Охрид, а спонзори се десеттина фирми.
