За ангажирање на механизација, работници, сол и чакал за чистење и за прскање на улиците во зимски услови, оваа сезона ќе се потрошат 538 милиони денари, односно 8,7 милиони евра. Oва се наведува во истражувањето и базата на податоци на трошоците за зимско одржување на патиштата за сезоната 2020/21, што денеска ги објави Центарот за граѓански комуникации (ЦГК).

Тендери за оваа намена имале 41 општина и Градот Скопје, 6 локални јавни претпријатија и државното јавно претпријатие за одржување и заштита на магистралните и регионалните патишта – Македонијапат. Само ова претпријатие има склучено договори за јавни набавки за зимско одржување оваа сезона во вредност од 5,7 милиони евра што е две третини од сите пари што ќе се потрошат за оваа намена.

Градот Скопје сам зимскава сезона планира да потроши 700 илјади евра за чистење на снегот и прскање на улиците, додека заедно со уште осум други скопски градски општини ќе бидат потрошени околу 1,4 милиони евра за зимско одржување на улиците. Од другите општини од земјава, најголема вредност за ова ќе потрошат Битола 225.643 евра, Прилеп 195.122 евра и Куманово 166.121 евро.

Општина Охрид за оваа намена, преку тендер склучила договор со локална фирма од с. Куратица во вредност од 6650 евра, додека проценетата вредност на набавката на индустриска сол за зимско одржување на ЈП „Охридски Комуналец“ изнесува 1 милион денари или колу 16.000 евра. За разлика од Охрид, Општина Струга за зимско одржување, до сега склучила осум договори во вкупна вредност од 81.300 евра. Општина Дебрца, според истражувањето, за истата намена склучила договор во износ од 19.187 евра. Податоците се изведени од Електронскиот систем на јавни набавки, информира ЦГК.

Најголем поединечен тендер има склучено Македонијапат со Димакс рудници Сопотница, од речиси седум милиони евра за двогодишно снабдување со сол за патиштата. Набавени се 59.555 тони индустриска сол, по цена од 116 евра по тон, за двегодишно прскање на патиштата.

Покрај оваа фирма, која вкупно има 4 тендери во вредност од 7,5 милиони евра, меѓу фирмите со највредни договори се и Ган-Логистик од Тетово со 1,2 милиони евра и скопски Аполо Инженеринг со 1 милион евра, се наведува во истражувањето на ЦГК.

OhridNews