Две лица го загубија животот во тешката сообраќајна несреќа што синоќа во 2:15 ч. се случи на регионалниот пат Струга – Дебар, кај  село Велешта.
Јетмир Сефери (30) од с. Радолишта, управувајќи ПМВ „фолксваген голф”, на местото каде патот се дели за Велешта и Дебар, со возилото излетал од коловозот, удрил во камена ограда, се превртел и завршил во двор на семејна куќа. Во несреќата на лице место починале возачот и неговиот сопатник Блерим Даути (33) од Струга.


Од „Голфот“ не останало скоро ништо
На лице место увид извршија полицијата и истражен судија. Како причина за несреќата се наведува преголемата брзина. На местото нема траги од кочење. Соседите со кои разговаравме го слушнале страотниот удар, по што како што кажаа се чула и експлозија. Од силината на ударот возачот и совозачот починале на лице место.


Местото на несреќата на влез од Велешта


Траги од крв на местото од несреќата

Возачот што го управуваше специјалниот камион со кој беше отстранет „голфот“ од местото на несреќата, рече дека „во живот не видел олку уништена кола и дека возачот сигурно возел со 200 на саат.“ Во дворот од куќата каде влетала колата имаше траги од крв, а цел блок на моторот беше исфрлен од колата. Жителите на Велешта велат дека ова не е прв пат на ова место да се случуваат сообраќајни несреќи со трагични последици. Според нив близината на ѕидот од куќа до регионалниот пат и непочитувањето на сообраќајните прописи се причина за многу жртви на ова место.


Г. Момироски
С. Костоски