Априлијадата традиционално, со песнички и игра се одбележа во сите објекти од ЈОУДГ „Јасна Ристеска“. Во програмата учество зедоа сите дечиња згрижени во градинката- од јасли па се до децата од поголемите групи.
– Задоволството е поголемо што од година во година и родителите се повеќе се вклучуваат во одбележувањето и се поинтересно ги подготвуваат костимите на нивните деца. Во почетокот, кога почнавме со одбележувањето на Денот на шегата беше поскромно, неколку деца носеа маски од дома, а другите ние ги подготвувавме. Со тек на време традицијата се пренесе и во домовите, сега имаме поголема соработка со родителите и може да видиме најразлични и убави костими, вели директорката на градинката, Марина Петроска Тодороска.
Весело и распеано беше и на градскиот плоштад каде Денот на шегата го одбележуваа најмладите основци од училиштата од Охрид.
