Македонските граѓани кои биле изложени на корупција, во просек платиле мито од 470 евра, најчесто за услугите на докторите во болниците, полицијата и професорите за полагање на испит.
Ова го покажа истражувањето на Државниот завод за статистика (ДЗС) како дел од проектот „Корупција во земјите од Западен Балкан“ на тема „Корупцијата во Република Македонија: Подмитувањето искусено од населението“.
Анкетата покажува дека 10,8 отсто од граѓаните имале искуство со корупција, но тоа не значи дека влегле во облици на корупција додека со конкретно подмитување искуство имале 6,2 отсто од граѓаните. Бројки се однесуваат на корупција во јавната администрација.
„Овие резултати покажуваат дека корупцијата има поголема распространетост во југоисточниот регион и скопскиот, додека многу помалку во југозападниот, Пелагонија и Полог. Во земјите во светот корупцијата се третира како урбан проблем, но кај нас се покажа дека е еднакво присутен и во руралните и во урбаните средини и подеднакво учествуваат и мажите и жените“, рече Благица Новковска, директор на ДЗС.
Резултатите покажуваат дека плаќањето најчесто е во пари, а многу помалку во услуги и подароци, најчесто граѓаните плаќаат мито за полесно да ја завршат работата.
„Голем дел од граѓаните корупцијата не ја сметаат како нешто криминално, туку како нешто што треба да го прават“, истакна Новковска.
За жителите на Македонија најголем проблем со кој се соочуваат граѓаните е невработеноста, сиромаштијата, а на трето место е рангирана корупцијата, другите облици на криминал не ги загрижуваат и се чувствуваат најбезбедни во регионот.
Истражувањето е направено во текот на есента минатата година на 3.500 испитаници.
извор: „Макфакс“
