Трагичната несреќа во која се загубени 14 животи треба да биде поука, животот не може да се надомести, рече претседателот на државата Ѓорѓе Иванов кој присуствуваше на денешната комеморативната седница што се одржа во Гостивар
Сообраќајките се настани кои ни ги крадат тие што ни се најмили. Кога некој умира знаеме дека тоа е неминовно, но вакви настани се потешки. Во овие моменти треба тагата да ја споеделуваме и мислиме на живите како да им дадеме утеха и да им помогнеме на најблиските. Тешка е загубата, но уште потешко е ако ваквите настани се повторуваат. Ова е поука да бидеме секогаш внимателни и поука за сите што се изложени на вакви настани секогаш да внимаваат, секогаш да имаме предвид дека нешто што е најскапо е животот, животот не може да се надомести. – рече Иванов.
На комеморативната седница присуствуваа бројни членови на семејствата на загинатите, пријатели, владини претставници. Пред присутните се обрати и премиерот Зоран Заев кој вети расветлување на причините за несреќата.
Тагата е заедничка, зборовите за утеха тешко се наоѓаат. Свесен дека зборовите не можат да допрат до душата која жали, дојдов да ви кажам дека загубата е ненадоместлива, но не сте сами, духовно сме со вас, а ќе бидеме со вас и во идинна. Имаме обврска да им помогнеме на семејствата, лично ќе се зложам и верувам дека ќе сториме се за да ги расветлиме причините за несреќата. – рече Заев.
Во вчерашната сообраќајна незгода што се случи околу 17 часот на патот Скопје-Тетово, загинаа 14 лица, а над 30 се повредени.
