– Денеска без никаков проблем беше преземен доверливиот гласачки материјал, односно гласачките лифчиња и избирачките списоци, и истите беа дистрибуирани до сите 84 општински изборни комисии. Од вечерва започнуваме и со 24 часовно обезбедување на доверливиот гласачки материјал се до неговото доставување на избирачките места, рече Јанкулоска.
Таа потенцира дека од полициски аспект, на два дена до отпочнување на молкот, може да се констатира дека предизборниот период поминал мирно и без ниту еден посериозен инцидент или поголемо нарушување на јавниот ред и мир. Досега е регистрирано само едно кривично дело „Насилство“ кое било целосно расчистено, а поднесени се неколку кривични пријави поради лепење плакати на несоодветни места.
Во предизборниот период регистрирани се и 33 случаи на пријавено оштетување на политичките штабови на СДСМ, ВМРО ДПМНЕ, ОМ, ДУИ, Сојуз на титови леви сили и Достоинство. Сите се со мала материјална штета.
– Во ниту еден случај не е употребено огнено оружје, што не беше случај при претходните Парламентарни избори. Изготвени се сите неопходни планови и подготвен е распоредот на полициските службеници по избирачките места. Ќе почнеме со обезбедувањето на избирачките места од 06 часот па се до 19 часот, потенцира Јанкулоска.
