Поттикнување на младите за креирање на авторски дела и нивна промотивна презентација е целта на проектот „Креативност“ кој ќе се реализира на 18 јули со почеток од 21 часот на плоштадот „Долна Порта”.
Во рамки на програмата опфатени се низа активности како презентација на креативни ламби изработени од дрво со микс сесија и Dj сет на Никола Тони, рачно изработени уникатни диорами инспирирани од светот на фантазијата и научната фантастика од страна на Јане Наумоски, промоција и презентација на книгата ROCK `N BEAT од Михајло Грбевски, како и презентација на дрвени играчки за деца и сувенири изработени од дрво изработка на Славко Баче, а Канео 2012 ќе се претстави со изработка на дрвени сувенири, сложувалки и играчки.
На настанот ќе биде претставен и Култ културниот центар – Охрид со уметнички дела и изработки создадени на креативните работилници. Академија СЈАЈ – Охрид ќе ја претставува креативната едукација за цртање на лице и тело, каде уметноста, боите и фантазијата се спојуваат во уникатно искуство. Преку современи техники и практична работа, учесниците ќе научат како со професионални бои и креативност се создаваат впечатливи уметнички трансформации за деца и возрасни.
Проектот е поддржан од Секторот за култура при Општина Охрид, како и други помагатели.
Организаторите посочуваат дека с=ако настанот биде одложен поради временска неприлика на денот на одржувањето ќе се презакаже наредниот ден на 19/07/2026 со почеток во 21:00 часот.
OhridNews
